Wednesday, September 02, 2009

ليه كده؟؟؟

Wednesday, April 18, 2007

2
لما مات ضي القمر عملوا له جنازة فظيعة كل الناس ، و داروا ورا جثمانه في ظلام تام يترحمون علي أيام الضياء اللي ما عرفوش قيمتها إلا دلوقتي . كل واحد قال كلمتين عن غلاوة الفقيد و أهمية الفقيد في حياتنا و ازاي قتله الاشرار حبة حبة في غفلة مننا –والله – غفلة استمرت مئة عام . ابا عن جد شفنا ضي بيتعذب و يبص لنا من فوق و في عينيه استغاثة و يبعث علي نوره اللي بيحاول رغم كل الظلام يساعدنا رسالة بتقول بس كلمة في صالحي تساعدني وانا منور حاراتكم و مزهزه مواعيد غرامكم و مدافع عن سهرانينكم ، كلمة مش أكثر كل سنه تخليني اقدر اكمل . لكن ابا عن جد كل واحد استني الكلمة تيجي من واحد تاني غيره ، اشمعني هواللي حيتكلم و يدفع ولاده الثمن ؟ ما النور للجميع يبقي العذاب لواحد بس ليه؟؟؟ كل واحد قال لنفسه و لعياله مع الزمن أن ضي القمر مسئولية القمر واحنا مالنا ؟ هو كان اسمه ضي الناس؟؟ هو لوحده كده مكتوب عليه و بينور لنا غصب عنه كمان و من الأخر كده مالوش عندنا حاجة. و سنة ورا سنة ابتدي ضي يتعب و يحتضر ببطء فظيع اصبح بيزعجنا ، و اصبح الناس يقولوا ما يغور بقي و يريحنا . سألت نفسي ليه الناس كده.. ليه يا دنيا كده؟؟؟ و عرفت الجواب في ليلة منورة ساعد ضي فيها نجمة كبيرة قربت شوية منه كأنها بتوشوشه. شوية الضي اللي بيبعثهم بيكشفوا وشنا العكر و لو مات آخر ضي خلاص مافيش داعي لمسئولية ولا دياولو و اهو جنازة احسن من نزناز يومي عن الواجب و الاصول . معقول؟؟؟؟
و مش معقول ليه ؟ مش سابوا المسيح يموت و بعدين عملوا حرب من وراه ؟ طب ما كانوا دافعوا عنه؟؟ مش سابوا الحسين يموت و بعدين عملوا مناحة و شغلانة و سبوبة منه ؟؟؟
طب ما كانوا راحوا له؟؟؟ مش ...... يووووه زهقت حتى الكلام متعب من غير ضي . لكن كانت جنازته جميلة و فيها بدأ فورا الشغل عشان يسموا شارع كفافيس بإسمه حيث أن كفافيس اجنبي خائن عميل برجوازي ، و بدايات موال يغنيه رشدي من تأليف الابنودي عن ضي و شوية كلام حتى عن تمثال و يمكن كمان تقديس اسم ضي بحيث لا يسمي به احد ابدا كذكري لمن يستحق أن تراق له الدماء عند ذكره بسوء .
عدت بعد 20 سنة من وفات ضي القمر عند قبره لقيت نصب قاعدين عليه كبار الاموات في بلدنا يبكونه فسألت مين ده رد علي صوت مرعب ياللتجديف من هذا الابله الذي لا يعرف ضي القمر ؟ حلال فيه الدبح و الخلاص منه . ده ضي اللي خيره علينا و علي ابائنا و احنا حزاني عليه منذ أن مات و لا نسمح لكائن من كان أن ينطق اسمه المقدس. نظرت له بتركيز و إذا بي امام جارنا صاحب القهوة اللي قدام مدفن ضي ، قلت له انت نسيتني يا عم مداح ؟؟؟ قال مداح مين انا راعي النصب ده اما مداح فمات من زمان و اولاده دلوقتي ماسكين المكان كله .
دورت وشي و مشيت و قلت الطيب احسن بقي ما دافعتش عنه حيا اقوم اموت عنه و هو ميت عشان اكشف واحد نصاب و كل اللي حواليه موافقين ؟ ده حال الدنيا . طلعت علي شارع منور لقيت نفسي في مكان غريب قابلني واحد غريب و قال رايح فين يابني؟ قلت هربان من معبد ضي . قال بس ايه اللي وداك هناك ده ضي صبح ملاك بيتباركوا بيه الملاك و يوزعوا باسمه الهلاك علي كل اللي بيروح هناك .
صحيت من غفوتي في عز النهار و الشمس قورت دماغي الوارمة اصلا ، لقيت الكرسي مايل و راسي مايلة علي ورا و الشمس فوقيها مدورة و الجرنان اللي معايا طار و عشان كده صحيت من غفوتي . قلت يا ساتر ايه الاحلام الضلمة دي عن ضي و حي و قهوة و زفت ، يظهر اني تقلت في الاكل و قمت ابص علي رقم الاتوبيس لقيت واحد يوديني محطة سيدي جابر فركبت و حمدت الله أن ضي القمر لسة موجود

No comments: